Во октомври, 2025 година во Хотел Романтик во Велес се одржаа две средби на трипартитната работна група за подготовка на нацрт Законот за спречување на насилството и вознемирувањето на работното место.
Средбите беа иницирани и организирани од страна на Економско социјалниот совет (ЕСС), преку Министерството за економија и труд, во партнерство со Меѓународната организација на трудот (МОТ). Целта на средбите беше усогласување на законската регулатива со Конвенцијата за насилство и вознемирување во светот на работата бр.190 на МОТ и отпочнување на процесот на подготовка на нацрт законско решение за спречување на насилство и вознемирување на работното место.
На првата средба одржана во периодот 8-10 октомври, 2025 година, беше презентиран Извештај за постоечката примена на Законот за заштита од вознемирување на работното место, изработен од проф. д-р Александар Ристовски.
На втората средба одржана во периодот 22-24 октомври, 2025 година, беа презентирани неколку нацрт-поглавја од законското решение за спречување на насилството и вознемирување на работното место, изработени од проф. д-р Александар Ристовски.
На расправата, учествуваа претставници на социјалните партнери (Министерството за економија и труд, репрезентативните синдикати и организации на работодавачи), државниот инспекторат за труд, невладини организации и други релевантни чинители во процесот.
